Esta fin de semana Noia converterase no epicentro da patinaxe galega. Os días 14 e 15 de outubro o Pavillón Municipal Agustín Mourís acollerá a segunda fase de Categoría Rexional, unha cita que traerá preto de 300 deportistas de todos os puntos de Galicia. O evento deportivo foi dado a coñecer onte polo Concello e o equipo responsábel do Club Noia Patín, a quen a concelleira Laura Salgado agradeceu o seu excelente traballo en materia de organización e de promoción deportiva dos talentos locais, desenvolvendo un importante labor para “que a patinaxe, ano tras ano, sexa un deporte que medre”. E engadiu: “Queremos invitar a todos os veciños a que se acheguen ao pavillón a gozar do mellor da patinaxe”. Máis información no Facebook do Club Noia Patín.
