Antón Luaces
A empresa naval española Navantia, a italiana Fincatieri e a francesa Naval Group -tres das maiores do cpntinente europeo- son as encargadas de construir a Corbeta de Patrulla Europea (CPE), buque multipropósito cun valor total, en primeira fase, de 87 millóns de euros. Deste proxecto encárgase un consorcio formado polas xa citadas tres industrias navais, a sociedade francoitaliana Naviris, e outros beneficiarios como son Dinamarca, Grecia e Noruega.
A Comisión Europea (CE), a través do Fondo Europeo de Defensa, apoia firmemente este proxecto que a propia CE cofinanciará con 60 millóns de euros. Outros 27 millóns serán aportados polos Estados membros da UE Italia, Francia, España, Dinamarca e Grecia, xunto con Noruega. A OOCAR (Organización para a Cooperación en Materia de Armamento) asinaron o pasado martes en Roma os documentos contractuais do proxecto e xestionarán todo o programa,
Polo que trascendeu ata o de agora, o buque, monocasco, terá unha eslora de 110 metros e 5 de calado. O seu desprazamento está fixado en 3.500 toneladas, con velocidade de ata 24 nós, e disporá dunha dotación de aproximadamente 100 tripulantes. Contará cunha cuberta de voo e un hangar para un helicóptero lixeiro, e poderá operar drons de ala fixa rotatoria.
Este buque substituirá en España a catro patrulleiros da clase Serviola actualmente en servizo , e os patrulleiros Infanta Elena e Infanta Cristina, que xa causaron baixa.
O programa de construción deste tipo de buque incide na cooperación de defensa europea e o seu obxectivo, a máis de contribuir á soberanía europea no ámbito dos buques de segunda liña, é o de afortalar a industria aumentando a eficiencia e reducindo os retrasos para pasar da necesidade militar á entrega ás Armadas.
A Corbeta de Patrulla Europea é un buque intelixente, asequible, sostible, interoperable e flexible, deseñado para cumprir cunha ampla gama de misións e evolucionar constantemente.
Para España é un navío que é quen de realizar misións de vixilancia e patrullaxe a longas distancias sen chegar á blindaxe e os sistemas de armas dunha fragata, pero dotado de sistemas defensivos e ofensivos avanzados. Terá autonomía para 8.000 millas (uns 45 días de navegación a 14 nós) a medio gas, e velocidade máxima de 24 nós.
