A axenda de Boiro vén completiña nesta primeira metade outubro, e tamén nas semanas seguintes. Por unha banda temos a mostra Madeiras do mar, de Ruth Beltrán, que se poderá visitar no segundo andar do Centro Social durante o mes de outubro, e que é unha proposta que xorde do proxecto Madeira Zombi, nado hai tres anos para, entre outras cousas, recuperar madeiras abandonadas para dotalas dunha nova vida a través da súa conversión en arte.
Tamén poderemos contemplar en Boiro a exposición Vida e obra de Francisco Fernández del Riego, a partir deste 9 de outubro e durante todo o mes na Casa da Cultura. É unha mostra realizada polo alumnado de plástica do IES A Cachada.
A maiores, os días 10, 17, 24 e 31 de outubro celebrarase no Centro Social de Boiro, ás 16.30 horas, o obradoiro Saberes en Común, do programa Muller e Saúde, que ten como finalidade rescatar os saberes e experiencias dos traballos que tradicionalmente desempeñaron as mulleres no rural.
Este xoves 12 o pazo de Goiáns acolle ás 19.00 horas o espectáculo Demente, da compañía de danza de Fran Sieira no marco do Mes da Danza do Concello de Boiro. A entrada será un donativo de 2 euros para AGADEA Alzhéimer. En caso de choiva, será na Casa da Cultura.
A contadora Vero Rilo estará na Biblioteca de Boiro o día 13 ás 20.00 horas para achegar o espectáculo para público familiar E a ti… que che contaban? A maiores, o sábado 14 celebrarase na Biblioteca de Boiro o obradoiro A biblioteca ideal. Crea un libro con nós de Os Náufragos Teatro para público infantil e familiar a partir dos 4 anos (prazas limitadas, inscricións no 981 84 84 10).
O sábado 14 proxéctase no Centro Social de Boiro o filme María Casares, ás 20.00 horas, no marco do Ciclo de Cine Mestre Mateo.
Informar tamén de que vai recalar en Boiro a función teatral Iphixenia na porta do súper, espectáculo da Compañía Humana que propón un monólogo adaptado do galés Gary Owen no que se fai un paralelismo entre o sacrificio de Iphixenia do mito clásico e unha moza de barrio actual, sen recursos, que sofre en primeira persoa as consecuencias da falta de médicos e de recortes sociais. Será o 2 de novembro.