A empresa alimentaria CONGALSA, con sede principal no Polígono da Tomada da Pobra do Caramiñal, fixo balance dos seus logros recentes en sustentabilidade ambiental, loita contra a emerxencia climática e protección da natureza. Segundo fixo saber a empresa, referente mundial no ámbito dos produtos do mar, nun ano conseguiu evitar a emisión de 4.232 toneladas de CO2 á atmosfera, o equivalente á capacidade de absorción de máis de 7.135 árbores durante corenta anos. Este logro conseguiuno CONGALSA da man da firma enerxética ENDESA.
En concreto este fito foi acadado grazas a un contrato de compravenda de electricidade a longo prazo, PPA (Power Purchase Agreement), que se alcanzou o ano pasado e que contempla o consumo de enerxía 100% renovábel durante un período de 10 anos.
“O acordo”, explica CONGALSA, “supón un novo paso na aposta de ambas as compañías pola sustentabilidade e no noso empeño por reducir o impacto ambiental das súas operacións, comprende o subministro de 15,5 GWh anuais de enerxía verde á empresa galega especializada na elaboración de produtos precociñados”.
No balance faise saber que o 50% da enerxía que ENDESA fornece procede de quilómetro 0, pois se produce nos parques eólicos que a filial de renovables de enerxética, Enel Green Power España (EGPE), ten en Lugo, de forma que se reforza o compromiso de ambas as compañías co impulso industrial e sustentábel en Galicia. A outra metade, é enerxía renovable certificada con Garantías de Orixe (GdOs) pola Comisión Nacional dos Mercados e a Competencia (CNMC).
No período de vixencia do contrato (o cálculo fíxose con 10,5 anos) as emisións evitadas sumarán 44.431 tCO 2 e, o que equivale á absorción de case 75.000 árbores durante 40 anos. 100% de enerxía verde
“O acordo con ENDESA evidencia moi ben a aposta da nosa compañía pola sustentabilidade, unha premisa que entendemos debe cumprirse desde unha tripla vertente: social, económica e ambiental. Precisamente, neste último punto é no que se encadra este acordo grazas ao cal estamos en disposición de afirmar que a nosa empresa consume enerxía verde nun 100%”, sinala David Comesaña, director de compras de CONGALSA.
Pola súa banda, ENDESA sitúa a conservación no medio no centro da súa estratexia de negocio, aliñada cos Obxectivos de Desenvolvemento Sustentabilidade e comprometida coa descarbonización da economía. Dentro desta aposta, os acordos a longo prazo ligados a enerxía renovable axudan á descarbonización do sector industrial e, ao mesmo tempo, son un instrumento moi útil para as empresas ao permitir xestionar mellor os seus custos enerxéticos garantindo prezos máis estábeis.
