Este luns 2 de outubro deron inicio as aulas do curso 2023-2024 de educación para persoas adultas que desenvolve o Concello de Boiro e nas que participan unhas cincuenta persoas. A concelleira, María Outeiral, participou na apertura das actividades formativas xunto co persoal docente que imparte as clases.
Estas ensinanzas están orientadas a persoas maiores de 18 anos que non teñen o título da ESO e ofrecen a posibilidade de adquirir, desenvolver ou complementar os coñecementos e aptitudes do alumnado para o seu desenvolvemento persoal e profesional.
A concelleira animou ao alumnado no inicio das clases: “Nunca é tarde para comezar a estudar e cada ano vemos como o paso por estas clases persoas que toman a decisión de facer algo novo e lles cambia a vida”.
Entre os obxectivos específicos deste curso están os de adquirir e actualizar a formación básica, mellorar a cualificación profesional, adquirir novos conceptos, técnicas e habilidades para unha adaptación ao mundo laboral actual. “Estas aulas non serven solo para adquirir un título, senón que van moito máis alá e a convivencia entre persoas de idades moi distintas fai que sexa unha experiencia moi enriquecedora tamén a título persoal”, afirmou María Outeiral.
A Aula de Educación para Persoas Adultas do Concello de Boiro está adscrita ao IES San Clemente de Santiago de Compostela e o profesorado do centro desprázase a Boiro para as avaliacións. Os cursos son cuadrimestrais de as clases impártense na Casa da Cultura de Boiro en horario de 20.00 a 22.00 horas para facilitar a compatibilidade coa xornada laboral.
