A agrupación teatral A Panadaría vai levar a Rianxo, esta finde, un dos seus meirandes éxitos sobre as táboas: As que limpan. Será este sábado 14 de outubro no Auditorio Municipal. O espectáculo, que vén da man do Concello (ao abeiro do programa Rede Cultural da Deputación da Coruña), dará comezo ás 20.30 horas. Trátase dunha peza de aproximadamente unha hora e media de duración, recomendada para persoas maiores de 12 anos. A entrada é de balde até completar a capacidade (a retirada de convites hai que facela dende unha hora antes do comezo da función na billeteira do Auditorio).
As que limpan parte dun letreiro pendurado no manubrio dun cuarto no que se le “Por favor, arranxe o cuarto”. Ao regreso da praia, as camas feitas, as toallas limpas e o baño impoluto. A obra fala da loita organizada das camareiras de piso dos hoteis por acadar uns dereitos laborais e sociais xustos.
As que limpan fala da loita organizada das camareiras de piso dos hoteis por conseguir uns dereitos laborais e sociais xustos. Fronte a elas, a avaricia voraz dos propietarios das cadeas hoteleiras.
Neste novo espectáculo as fundadoras da Panadaría formúlanse estas preguntas: é posíbel revalorizar este traballo e desligalo do xénero? Existe un turismo sustentábel? Quen limpa a casa da limpadora?
“Hai persoas que nunca limparon un váter e hai outras que limpan cincocentos ao mes”, sentencian dende A Panadaría.