A deputada do BNG Rosana Pérez criticou este martes 12 de setembro a política do novo conselleiro do Mar, Alfonso Villares, que cualificou de “continuista” en relación ao traballo da súa antecesora, Rosa Quintana. A pobrense Rosana Pérez convidou ao conselleiro a “asumir a situación que atravesa o sector e a escoitar aos seus representantes”, incluídos aqueles que lle resultan “molestos e que aínda seguen esperando a ser atendidos polo novo conselleiro, que nin sequera lles contesta”, dixo, engadindo que “non abonda con mudar as caras, hai que mudar a actitude”, tras escoitar ao novo titular de Mar nunha comparecencia a petición propia para dar conta da súa xestión.
Referiuse, en concreto, á polémica que se está a vivir na ría de Muros-Noia polas verteduras da mina de San Finx. “Todo o sector da ría pide a gritos que non manteñan o despropósito e o desatino que supón a mina e vostedes aínda veñen de conceder o vertido de augas en febreiro”, expuxo como “exemplo de falta de diálogo”, apuntando que é “difícil chegar a puntos de encontro cando se nega de maneira sistemática a realidade”. Rosana Pérez aproveitou a sesión deste martes no Parlamento para advertir da “perda de produtividade alarmante e manifesta nas rías galegas”. Tamén urxiu ao conselleiro a actuar xa para poñerlle remedio cun plan estratéxico de recuperación e co orzamento preciso para a súa aplicación.
“Vostedes seguen actuando como se non pasara nada”, díxolle a deputada, quen lembrou que os datos que apuntan dende hai anos a unha preocupante falta de produción, datos “que non inventa o BNG” senón que “saen de organismos da propia consellería, como Pesca de Galicia, ou do INE”, comentou a deputada da Pobra, engadindo que “nos últimos anos a produción vai a menos, perdemos buques, perdemos Permex e perdemos postos de traballo”.
A deputada nacionalista criticou tamén a falta de execución dos orzamentos da Consellería, como sucedeu no 2022, ano con 197 millóns de euros “dos que quedaron sen executar case cincuenta”.
A representante do BNG criticou tamén “a pasividade da Consellería do Mar para facer valer os intereses de Galiza ante a Unión Europea”. Tamén se laiou de que “non se teñan cumprido os acordos do Parlamento para aumentar o peso de Galiza nas negociacións coa Unión Europea no relativo á pesca”, dixo.
