O BNG vén de escoller a Ricardo Suárez como representante da formación na Mancomunidade Serra do Barbanza, a entidade responsábel da xestión dos residuos urbanos nos municipios de Carnota, Muros, Noia, Lousame, Porto do Son e Brión (como membros de pleno dereito), así como en Ames, Rois e Pontecesures (como clientes da planta de reciclaxe de Servia, en Lousame).
Desta forma, a actual alcaldesa de Muros, María Lago, que tamén fará parte da xunta reitora da mancomunidade na condición de mandataria da localidade muradá, deixa paso a Suárez como representante da forza nacionalista no órgano.
Por outra parte, o BNG tamén nomeou ao brionés Tito Souto como relevo para acudir ás reunións da xunta reitora da Mancomunidade Serra do Barbanza.
O BNG denunciou o que considera unha “falta de iniciativa” na entidade e “os reiterados incumprimentos dos estatutos da mancomunidade por parte das últimas presidencias”.
“Chegou xa o mes no que remata a concesión da xestión da planta á actual empresa adxudicataria e a
presidencia permanece inactiva e sen activar os órganos de debate e decisión, leva todo o mandato sen convocar unha asemblea xeral e fai máis dun ano que non se celebra xunta reitora, deixando á cidadanía e ao persoal da planta nunha situación de incerteza total”, salientaron os nacionalistas, engadindo que “os estatutos obrigan a que os órganos de xestión sexan convocados, mais na mancomunidade reina o escurantismo, algo máis grave ante momento crítico que vive a planta de reciclaxe de Servia”, destacou a representación do BNG.
E engadiron: “Tanto as anteriores presidencias do PP como o actual mandatario socialista demostraron unha actitude antidemocrática e un total desleixo que deixa ao persoal da planta ante un futuro incerto”.
A forza nacionalista tamén alertou sobre as consecuencias da intención do Ministerio para a Transición Ecolóxica e o Reto Demográfico (MITECO) de acabar co modelo húmido-seco, a tipoloxía de reciclaxe coa que funciona a planta de Servia. “O Goberno español acaba cun modelo eficiente como o da planta da mancomunidade, mais o PSdeG non asume a súa responsabilidade, nin ofrece unha alternativa que actualice a planta e asegure a conservación dos postos de traballo”, afirma o BNG.
“O prioritario”, sinala Ricardo Suárez, “sería que os concellos que forman a Mancomunidade fixesen unha auditoría do estado da planta, redactasen uns novos pregos de contratación, e contratasen unha xestora propia que dirixira a planta, xa que, neste momento é a propia empresa a que leva a xerencia, descoidando o mantemento das instalacións e incumplindo sistemáticamente as condicións do contrato”.
