A Asociación Cultural Taller Alecrín vai encher a nosa comarca de actividades formativas arredor do baile co ciclo de obradoiros Baila con Nós. Entre os concellos incluídos na xira de Alecrín polo Barbanza atópase Porto do Son, que, xunto con Lousame, será dos primeiros en acoller as actividades de formación (a a partir deste semana). Celebraranse en colaboración co Concello sonense.
O ciclo de obradoiros porá o foco na linedance (modalidade de práctica en grupo na cal poderemos inscribirnos de xeito individual e na que se fará un percorrido dende o swing ata o funky pasando polo disco ou ritmos latinos como a bachata) e nos bailes de salón (onde se amosarán coreografías de tango, cha-cha-chá ou kizomba e para o que haberá que inscribirse en parella).
A Asociación Cultural Taller Alecrín é unha entidade que dende hai máis de trinta anos segue a ser referente no ensino do baile na comunidade galega. Actualmente desenvolve as súas actividades nas contornas de Santiago e Barbanza
As actividades formativas son impartidas por Francisco Muñiz, licenciado en Filosofía, xestor cultural, mestre e adestrador de baile deportivo, tango arxentino, salsa e linedance, coreógrafo e bailarín, é o responsable da Dirección Técnica e Pedagóxica do Taller Alecrín dende os seus inicios.
Datas en Porto do Son
14 de setembro na Casa da Cultura de Portosín
21 de setembro na Casa da Cultura de Queiruga
28 de setembro na Escola Municipal de Danza de Porto do Son
Información e inscricións no teléfono 698 150 432.
