A Deputación da Coruña publicou este martes 26 de setembro, no Boletín Oficial da Provincia, a concesión definitiva das subvencións a entidades deportivas da provincia sen ánimo de lucro para infraestruturas e equipamento deportivo. As axudas chegan este ano a un total de 80 entidades deportivas da provincia cun investimento total de 568.579,88 euros.
O deputado de Deportes, Antonio Leira, sinalou que a Deputación destina este ano 3,5 millóns de euros en diferentes liñas de axudas a entidades deportivas para o fomento do deporte, a competición federada en diferentes categorías, o apoio a grandes eventos deportivos e a dotación de novos equipamentos e infraestruturas.
“As liñas de subvencións deportivas da Deputación da Coruña contribúen a manter a actividade e a mellorar as infraestruturas de centos de clubs en competicións de todas as disciplinas e categorías deportivas, axudando a situar aos equipos coruñeses na vangarda do deporte galego”, apuntou Leira, que detallou que máis de 600 entidades deportivas da provincia reciben o apoio da Deputación cada ano.
As axudas para equipamentos, que oscilan entre os 3.060 e os 9.500 € destínanse a cuestións como a adquisición de equipamento para vela adaptada e tenis de mesa inclusivo (ADECO-DEA), adquisición de lancha pneumática de salvamento e control de ruta (Club do Mar de Cariño), adquisición de embarcacións, remos e remolque (Club de Remo de Muros), renovación do chan do pavillón de San Amaro (Club do Mar de San Amaro), rehabilitación das pistas de pádel e substitución do céspede e peche perimetral (Casino Ferrolano-Tenis Club), adquisición de embarcacións e peirao flotante (Club Náutico Deportivo de Barraña, Boiro), compra de canastras 3×3 e minibasket (Federación Galega de Baloncesto), adquisición de tatami de competición (Federación Galega de Taekwondo) ou ferramentas electrónicas para a mellora do rendemento deportivo no baloncesto (Fundación Universitario de Ferrol).
Pódese consultar a lista completa no BOP deste martes 26 de setembro.
Inclúense axudas a entidades da nosa comarca como a Asociación Deportiva Esteirana Remo, o Club Piragüismo Rianxo, o Club de Remo Muros, o Club de Remo da Pobra, o Club de Remo de Rianxo, o Club Deportivo Natural Sport VIDELGI-Ribeira, o Club do Mar de Noia, o Club Halterofilia Noia, o Club Náutico Deportivo de Barraña (Boiro), o Club Náutico de Ribeira, o Club Remo Cabo de Cruz, o Club de Remo do Náutico de Ribeira e o Club Piragüismo Outes.
