A vila de Porto do Son honrou hoxe á Virxe do Carmen nas súas tradicionais festas que empezaron onte e alongaranse ata o luns. Logo das dianas e alboradas de Canlebó e da actuación da Banda de Música de Noia, Porto do Son celebrou a procesión do Carme dende a capela da Atalaia até o porto, ondetivo lugar a misa solemne . Ao rematar, celebrouse procesión marítima.
Pola súa banda o conselleiro do Mar, Alfonso Villares, acompañado polo director xeral de Pesca, Acuicultura e Innovación Tecnolóxica, Antonio Basanta, e polo delegado territorial da Xunta na Coruña, Gonzalo Trenor, asistiu hoxe ao xantar organizado polo Concello e a confraría de pescadores local no marco dos actos pola festividade da Virxe do Carme.
As festas alongaranse durante a fin de semana e así este sábado 9 será o día da Virxe do Loreto. A xornada comezará novamente con Canlebó e, tamén, coa Banda de Música de Caamaño. Haberá misas na capela do Loreto (cada hora dende as 8h até as 13h, e pola tarde ás 19 e ás 20h). Ás 13h celebrarase unha sardiñada popular no campamento do Loreto e Paco de Leña encargarase da sesión vermú. A verbena, pola noite, virá da man de Olympus, Chocolate Disco Móbil, Kike Varela e Mateo Abelleira.
O domingo será na honra de San Roque. Comezará con Canlebó e coa Banda de Música de Caamaño. Ás 12h haberá misa solemne na capela da Atalaia e logo procesión. Ás 19.30 terá lugar a Festa das Cores no porto e pola noite verbena con Parías de Noia e Costa Dorada. O luns 11 comezará coas dianas e alboradas de Chorimas e a Banda de Caamaño. Ás 12 haberá misa solemne na igrexa parroquial, seguida de procesión. Ás 17h, inchábeis e xogos para a rapazada no xardín do porto. Pola noite, verbena con Marbella e Assia. Ás 0.00 botaranse os fogos de artificio. As festas rematarán cunha ruada, unha festa da auga e unha traca final a cargo da Charanga Os Celtas.
