Culturactiva Producións vai representar na terra natal do autor de Cousas e Retrincos, Rianxo, un espectáculo teatral que rende homenaxe a Castelao poñendo o foco na súa nenez.
A función familiar Castelao, pertencente á programación da Rede Cultural da Deputación da Coruña o Concello de Rianxo, será este sábado 30 de setembro ás 20.00 horas, na Sala Arcos Moldes do Auditorio de Rianxo. As persoas interesas en acudir deberán retirar os seus convites dende unha hora antes do comezo da función na billeteira do Auditorio.
Castelao é a primeira obra sobre o autor de Rianxo dirixida á nenez, en concreto a un público de seis a 10 anos e ás súas familias. Con texto de Paula Carballeira e dirección de Fina Calleja, a peza presenta un Alfonso Daniel de oito anos feliz e aventureiro na súa vila natal.
Trátase, segundo se fixo saber na presentación, “dunha montaxe de ritmo trepidante na que a tensión dramática cabalga sobre o lombo dunha persecución polas rúas de Rianxo nas horas previas á partida cara Arxentina do escritor e a súa nai”.
