O Concello de Ribeira aprobou, mediante a xunta de Goberno local, a modificación do sentido da circulación na rúa Doutor Torres de Palmeira atendendo á demanda urxente dos veciños e veciñas. O cambio, segundo explicaron fontes do Consistorio reflectindo as peticións dos residentes, responde á problemática do paso simultáneo de vehículos e á necesidade de regular a liña de estacionamento habitual nesa rúa; co propósito de asegurar o tránsito dos peóns e residentes.
“Tras reunirnos cos veciños, vimos que o exceso de circulación de vehículos en ambos sentidos aumentaba o risco de accidentes”, explicou o alcalde Luís Pérez. Debido ao carácter residencial da rúa, procedeuse a establecer o sentido único ascendente (dende o adro da igrexa de Palmeira até a rúa Río Azor) e a delimitar o estacionamento ao lado esquerdo da vía mediante as sinalizacións correspondentes.
