O Concello de Boiro acolle un ano máis o ciclo de cine Mestre Mateo, un proxecto impulsado pola Academia Galega do Audiovisual coa colaboración da Deputación da Coruña mediante o que se proxectan as películas finalistas dos premios Mestre Mateo. A concelleira de Cultura, María Outeiral, e o técnico de cultura, Alberto García, fixeron na mañá deste martes 26 de setembro a presentación do ciclo que comeza este sábado.
Mediante esta proposta inclúese o cinema na programación cultural do Concello de Boiro cunha charla coloquio ao rematar cada sesión. “Volvemos a ter cine en Boiro da man da Deputación de da Academia Galega do Audiovisual proxectando as películas finalistas dos Premios Mestre Mateo e cun concepto distinto no que poder comentar os filmes ao rematar”, afirmou a concelleira.
A primeira das sesións será este sábado 29 de setembro ás 20.00 horas no Centro Social de Boiro coa proxección de Código Emperador. Cada sábado á mesma hora e ata o 18 de novembro vanse proxectar os filmes Código Emperador, No somos nada, María Casares, Live is Life, Onde máis doe, A Foreing Song, O corpo aberto e Unicorn Wars.
“As películas que se van a proxectar neste ciclo son as producidas en Galicia no último ano, filmes que imos ter oportunidade de ver en pantalla grande”, afirmou o técnico de cultura Alberto García. Ademais deste ciclo o Concello de Boiro continuará con outras proxeccións para seguir contando con cine como unha proposta cultural no municipio.