O Concello de Dodro (a través da Concellería de Cultura e Patrimonio) organiza este sábado o Festivalo 23, que se vai celebrar no Valo de Manselle na aldea do mesmo nome e onde unha vez máis poderase desfrutar da mellor música galega actual e de xeito gratuíto.
Pulpiño Viascón e a súa Musicleta será o encargado de inaugurar o evento. Farao cun espectáculo humorístico e de animación en formato de “home orquestra”. Será ás 20.00 horas. Trátase dun espectáculo para toda a familia con todo tipo de aparellos sorprendentes convertidos en instrumentos. A actuación que forma parte da Rede Cultural 2023 da Deputación da Coruña.
Algo máis tarde actuará Pecha a Cansela, grupo de rock de Dodro integrado por Antía, Lois, Martiño, Jorge, Saleta e Duarte.
A continuación será a quenda de García MC e Nación Quilombo, ás 22.30 horas. García MC é un dos máis reputados rapeiros do panorama galego. Esta tempada presenta Archipiélago Quilombo, o seu segundo disco, publicado no 2022. Reggae, latin, hip hop pero sobre todo mensaxes, ideas en cada rima, en cada frase, son os ingredientes básicos do seu traballo.
Este concerto intégrase na Rede Cultural da Deputación da Coruña.
