A conselleira de Política Social e Xuventude, Fabiola García, estivo este martes 12 de setembro na súa terra de orixe, en Ribeira, coincidindo coa nova estadía na cidade da unidade móbil do programa de Coidados Porta a Porta da Xunta de Galicia (dende onte e até mañá mércores). Segundo fixo saber a conselleira, o programa atendeu a máis de 50.000 persoas maiores, que recibiron gratuitamente coidados en podoloxía, audioloxía e estimulación da memoria nas oito unidades móbiles deste servizo que percorre todos os concellos de Galicia, agás as sete grandes cidades.
A conselleira destacou “a importancia do Coidados porta a porta para achegar servizos de proximidade e de calidade ás persoas maiores”.
En Ribeira esta é a terceira parada que fai o programa, e nas súas anteriores un total de 150 veciños beneficiáronse deste servizo. O horario de atención é de nove da mañá a oito da tarde e as persoas que desexen acudir soamente teñen que pedir cita previa nos número de teléfono 622 748 283 ou 623 546 992, ou ben na seguinte dirección de correo electrónico coidadosportaaporta.politicasocial@xunta.gal
Fabiola García garantiu “o compromiso do Executivo autonómico cos maiores de Ribeira”, e puxo como exemplos “a posta en marcha das Aulas do maior de Aguiño” ou “a próxima construción da nova residencia, con 100 novas prazas públicas”.
