Este domingo 17 de setembro celébrase a nova edición (a dezasete) do Cross de Verán de Broña (Outes), precedida dunha andaina solidaria o día anterior, o sábado, en favor da asociación inclusiva da comarca ADIBISMUR.
A andaina celébrase como dixemos o 16 de setembro, da man do Club de Atletismo. Inclúe un percorrido de 12 quilómetros pola Ruta dos Carpinteiros, que dará comezo ás 9.30 horas. Esta actividade deportivo-solidaria tivo o prazo de inscrición até este xoves, aínda que é posíbel formalizar a nosa participación no meso día da actividade no punto de control, na caseta de socorrismo de Broña.
Polo que se refire á XVII edición do Cross de Verán de Broña, está organizada polo Club Atletismo Outes en colaboración co Concello, a Deputación Provincial da Coruña, a Asociación Veciñal O Pedregal (San Cosme, Outes), Protección Civil de Outes, Cruz Vermella de Noia, IDIS (Instituto de Investigación Sanitaria de Santiago), Club Revoltas Ciclistas e Asociación Terra de Outes. Haberá dous dorsais de 10 e 5 quilómetros e categorías de menores, infantil e cadete. Malia que as inscricións pecharon este xoves, as e os deportistas das categorías de menores de idade, de maneira excepcional, poden apuntarse na proba o mesmo día da celebración.
