O Concello de Boiro colabora cunha nova edición da andaina de convivencia Un mar de sorrisos, que organiza a Clínica Dental Rebeca Ozores e que ten como finalidade promover os hábitos de vida saudábeis. Na presentación da actividade, celebrada na mañá deste martes 26 de setembro, participaron o alcalde, José Ramón Romero; e a xerente da clínica, Rebeca Ozores; e Antía Romero.
“Cada vez son máis as entidades e empresas que organizan eventos ou actividades como esta con fins solidarios ou que teñen como obxectivo promover o deporte ao aire libre, a actividade física e os hábitos de vida saudábeis”, afirmou o alcalde.
A andaina celebrarase o vindeiro domingo día 1 de outubro con saída ás 10.30 horas dende praia Xardín e fará un percorrido por toda a costa ata a praia de Mañóns.
“Trátase dun percorrido moi bonito de 13 quilómetros que transcorre todo pola costa e percorre as nosas praias e que rematará cun xantar e convivencia en Mañóns”, afirmou Antía Romero, da Clínica Dental Rebeca Ozores. Ao remate do percorrido haberá un concerto de D’Crooners e actividades para a rapazada na zona de Mañóns. A andaina é totalmente gratuíta e o prezo do xantar será de 10 euros.
“Esta andaina naceu fai cinco anos coa intención de relacionarnos nun ambiente relaxado de natureza e mar e que habitualmente non temos na clínica”, afirmou Rebeca Ozores. Hai inscritas preto de 250 persoas e as inscricións están abertas ata o venres 29 e poden facer na Clínica ou online.
