A campaña Galicia sabe aMar, da Consellería do Mar, segue a súa ruta pola nosa comarca, logo de visitar Porto do Son e Portosín. No arrinque desta semana (luns e martes, 11 e 12 de setembro), en horario de 12:00h a 15:00h e de 18:00h a 21:00h, a foodtruck dende a que se reivindican os beneficios (nutricionais, culinarios, económicos) dos nosos produtos pesqueiros e marisqueiros poderá visitarse na Alameda de Noia, novamente, achegando a veciños e visitantes petiscos “co mellor do noso mar”.
Galicia sabe aMar é é unha campaña da Xunta de Galicia que nace no verán de 2021 para animar á cidadanía a través da retranca galega e os dobres sentidos a consumir produtos do mar, impulsar a súa venda e poñer en valor o labor dos profesionais da pesca e do marisqueo.
Este 2023 a iniciativa sóbese ás catro rodas a través de catro foodtrucks que levarán o sabor das rías galegas por máis de 250 municipios de toda España vinculados ao Camiño de Santiago. En cada parada os visitantes poderán degustar algún dos 10 petiscos pensados para a campaña e realizados a base de produtos certificados do mar e da terra.
