Con vistas ao inicio do curso 2023-2024, o Concello da Pobra do Caramiñal confirmou que o alumnado e as familias contarán novamente co Servizo de Madruga e Comedor dirixido ás crianzas da Infantil e da Primaria. Os servizos teñen aberto o prazo de inscrición.
Trátase dunha medida que, segundo explica a concelleira da Igualdade, Estefanía Ramos, busca facilitar a volta á rutina das familias e contribuír a que poidan conciliar a vida persoal e laboral. Os ditos servizos estarán operativos, polo tanto, a partir do día 11 de setembro, data en que inicia o ano académico.
A ficha de inscrición está á disposición en www.apobra.gal e tamén no Departamento da Igualdade, situado fronte á Casa Consistorial. O trámite pódese efectuar precisamente nesta área municipal ou tamén a través das propias ANPA. No documento, ademais dos datos de carácter persoal e de contacto, deberase dar conta de información de interese como, por exemplo, enfermidades ou alerxias, ademais do período e número de horas elixidos para facer uso das prestacións.
