A Deputación da Coruña anunciou que vai destinar este ano 499.307 euros para apoiar ás confrarías de pescadores e agrupacións de mariscadoras e mariscadores da provincia en cuestións coma a contratación de persoal ou a modernización das súas infraestruturas, procesos de produción e comercialización. A resolución definitiva de concesión das axudas vén de ser publicada no Boletín Oficial da Provincia deste martes, 19 de setembro.
A deputada responsábel da área de Mar e Medio Rural, Crisitina Capelán, subliñou “a importancia social e económica que os sectores pesqueiro e marisqueiro teñen na provincia da Coruña, onde xeran miles de empregos”.
Tamén dixo que “desde a Deputación queremos seguir apoiando a un sector estratéxico na nosa provincia” e destacou “que as axudas chegan á práctica totalidade dos pósitos da provincia e supoñen unha axuda fundamental para o seu funcionamento”.
Nun plano máis específico, a través deste programa as confrarías reciben axudas de entre 5.500 e 30.000 euros que poden destinar á contratación de persoal ou servizos externos como a vixilancia, adquisición de sementes de moluscos, modernización de procesos de comercialización, alugueiro de maquinaria, control de descargas, controis de calidade do produto, servizo de asesoramento aos pescadores artesanais, e outras actividades que supoñen melloras na súa actividade.