A patronal boirense (ABE) puxo en marcha unha nova campaña para fomentar o coidado do medio ambiente e aliñada coa estratexia da Alianza Galega polo Clima na que está integrada a asociación empresarial. Desta volta o obxectivo é “reducir o consumo de plásticos e elementos non biodegradábeis nos envases que utilizan os negocios de hostalería para o envío de bebidas e alimentos a domicilio”, informou a patronal.
Deste xeito a ABE coa colaboración do Concello de Boiro distribúe aos seus locais asociados mais de 6.000 envases biodegradábeis feitos de caña de azucre, bambú e papel reciclado. Dentro dos recipientes destacan os vasos para bebidas quentes, dous tipos diferentes de soportes para estas bebidas e envases de 1,2 litros para alimentos. Os envases tanto para comida como para bebida xa están dispoñíbeis e os socios da patronal que o desexen poden contactar para reservar e recoller o seu lote.
Como indica o presidente Daniel García “dende a ABE estamos apostando pola posta en marcha de diferentes accións relacionadas co coidado do medio ambiente e a economía circular e esta é unha delas” ademais afirmou que “o obxectivo é por un lado concienciar aos socios e a cidadanía que con pequenos xestos como o de utilizar envases elaborados con vexetais, como a caña de azucre, redundan nunha mellora substancial do medio ambiente e tamén serven para mellorar a imaxe de marca do tecido empresarial local que se posiciona a prol do coidado do planeta”
Esta campaña segue as liñas estratéxicas establecidos no marco da Alianza Galega polo Clima, unha iniciativa que avoga pola busca de medidas comúns e coordinadas que xeren sinerxías na acción climática en Galicia e da que a ABE forma parte dende maio deste ano.
