Volve Paisaxes Sonoras, o festival do destino Barbanza Arousa (Ribeira, A Pobra do Caramiñal, Boiro e Rianxo) que naceu co obxecto da posta en valor do territorio dando a coñecer as súas paisaxes e o seu valor patrimonial. Esta nova edición de Paisaxes Sonoras, a cuarta do festival, abrangue un importante elenco de artistas, segundo informou a Mancomunidade Barbanza Arousa, impulsora do certame, que sinalou que desta volta o festival iníciase o venres día 25 ás 20:00h coa actuación de Sés no porto vello de Taragoña (Rianxo). Esta actuación estará precedida por un roteiro guiado desde o castelo da Lúa con saída ás 17:00h ata o lugar de celebración do concerto. Para participar nesta actividade cortesía do concello de Rianxo debe realizarse reserva previa no teléfono 622322953 ou no correo electrónico turismo@avivae.com.
A seguinte actuación, a cargo do grupo Leilía, desenvolverase o sábado 26 ás 13:00h no parque da Cachada de Boiro. Ese mesmo día ás 20:00h terá lugar o concerto de Andrés Suárez no parque periurbano de San Roque (Ribeira) O peche do festival vai da man de Xabier Díaz e as Adufeiras de Salitre o domingo 27 ás 13:00h na contorna da praia dos Areos na Pobra do Caramiñal. Durante a celebración do festival poderase degustar a gastronomía local e os viños da IXP de Barbanza e Iria da man dos sumillers Pedro Sestayo da Asociación Gallaecia (venres e sábado) e Juanjo Figueroa Treus da Asociación Galega de Sumilleres (domingo).
As entradas continúan á venda a través da plataforma www.ataquilla.com.
