Os tres navegantes foron recollidos en perfecto estado de saúde e deixados en terra.
Todo sucedeu sobre as tres e vinte desta tarde. A esa hora, unha persoa particular contactaba co 112 Galicia para informar dunha lancha pneumática moi adentrada no mar, segundo relataba esta persoa, estaba a unha distancia excesiva para ese tipo de embarcación e podía resultar perigoso polo estado que presentaba o mar nesa zona, na praia de Boca do Río, en Xuño, no concello de Porto do Son.
Con estes datos, desde o 112 informouse da situación ao persoal de Salvamento Marítimo, que desprazaron axiña a embarcación Salvamar Régulos. Así mesmo, informouse dos feitos ao Servizo de Gardacostas de Galicia, aos efectivos da Agrupación de Voluntarios de Protección Civil da localidade e aos axentes da Garda Civil e da Policía Local.
Con todo, os efectivos de Protección Civil indicaron que a embarcación de Salvamento recolleu aos tres navegantes e trasladounos a terra. Todos eles en perfecto estado.
