O salón principal do Real Club Náutico de Portosín foi o marco de presentación da XXXV Regata Mar de Finisterre, que desde o últimas nove edicións promoven Dominga Sabín e Jacinto Hernández, baixo a denominación de Trofeo Pitusa Sabín.
Pitusa e Jacinto, recentemente chegados de Estados Unidos foron os anfitrións ante os medios de comunicación da presentación oficial da gran cita velística, conducindo o acto Jorge Arán, presidente da entidade social e deportiva, acompañado de Carlos Lorenzo, concelleiro de deportes do Concello de Porto do Son; Pablo García, comodoro; así como de Isaac Gaciño, patrón maior da Confraría de Pescadores de Portosín; e José García, Jesús Sulleiro e José Antonio García, membros da directiva.
“Nós, como entidade deportiva, organizamos ao ano dúas grandes regatas: unha mira cara ao sur, roldando Corrubedo; e a outra cara ao norte, chegando ata Fisterra, que é a que patrocinan Pitusa e Jacinto e que está chea de grandes atractivos paisaxísticos, pero tamén dunha navegación máis superficial”, comentaba o presidente Arán.
“O club terá un barco sempre pendente dos regatistas nesta travesía, xa que é un percorrido por mar aberto nalgúns tramos e noutros o trazado está cheo de baixos rochosos”, explicaba o comodoro Pablo García.
“Como sempre Pitusa e eu estamos moi contentos de patrocinar este evento”, dicía Hernández. “Para o meu non só é un evento deportivo, é un tributo a esta señora (en referencia á súa muller Pitusa), que sempre foi moi altruísta coa xente que necesitou algo nesta zona. Sempre estivo disposta ao que fora”, terminaba dicindo Jacinto.
A primeira proba dispútase este sábado, cun trazado costeiro de 40 millas náuticas, un 74 km. entre Portosín e a Enseada de Fisterre, de ida e volta, facendo paso intermedio polo Faro do Carrumeiro
Novo, moi próximo á boca de entrada da ría de Corcubión. Os máis pequenos realizarán un percorrido polo interior da ría de Muros e Noia dunhas 10 millas, un 18 km., sendo, con toda probabilidade, a súa metade de percorrido unha boia fondeada nas inmediacións da praia de Arnela.
O domingo o comité da regata ten programado celebrar dous bastóns ao vento, os clásicos barlovento-sotavento en augas muradás e noiesas.
Os barcos que se suman a esta novena edición do Trofeo Pitusa Sabín son o Siradella, de Fernando Gude e César Álvarez, do Real de Portosín; o Urbapaz, de Fran Edreira, do Club Náutico Cabanas; o espectacular Lambaix, de Antonio Ríos, e o Eleko Mambo, de Cándido Losada, ambos de Cabanas; o Cámping Ría de Arousa, de José Manuel Pombar, do Club Náutico Arousa Norte; o Ronáutica Mariñas, de Jorge Carneiro, do Club Náutico San Telmo; o Kanala, de Ignacio Ecenarro, de Portosín; o Adegas Terrae, de Vicente Cid, do Real Club Náutico de Vigo, que vén de gañar a súa División de ORC 3 no Rías Baixas; ou os J80 Impresión 3D Atlántico, de Guillermo Blanco, do Real Club Náutico da Coruña e o Namaste, de Luis de Mira, do Monte Real Club de Iates, entidade á que tamén representa o Orión,de Alberto Pérez, entre moitos outros e que son embaixadores de máis dunha decena de entidades náuticas e deportivas de Galicia.
O top de saída, en ambas as xornadas da fin de semana, está programado ás 12.00 horas do mediodía.
Foto Juan Caballero
