A Asociación Cultural Alberto Romero convocou a oitava edición do certame de curtametraxes que leva o nome do escritor, divulgador, comunicador e dinamizador cultural palmeirán. Segundo fixo saber a entidade, o prazo para inscribirnos e presentar contribucións abre o vindeiro 10 de outubro e pecha o 28 de febreiro do ano vindeiro. Temos toda a información relativa ao concurso dispoñíbel na web da asociación.
Haberá categorías de Primaria e Secundaria para centros educativos da Mancomunidade Barbanza Arousa, categoría de Diversidade Funcional aberta a toda Galicia e categoría Libre aberta a toda Galicia ou obras en galego no exterior. Tamén unha categoría específica de creadoras e creadores do ámbito de Barbanza Arousa.
O certame conta coa colaboración da Mancomunidade Barbanza Arousa, ANPAs Barbanza Arousa, a Deputación da Coruña, o Concello de Ribeira, Obra Social Fundación La Caixa e as empresas da nosa comarca Chicolino e CONGALSA.
As Curtas Premiadas da Séptima edición foron:
-PRIMARIA: “A RAPAZA DE PLÁSTICO” de Gargallada Teatro do Salustiano Rey Eiras de A POBRA DO CARAMIÑAL
-SECUNDARIA: “COMA” de Lucía Sánchez Varela e Alejandra Santiago Rodríguez do IES Espiñeira de BOIRO
-DIVERSIDADE: “A SEREA MARIÑA” da ASOCIACIÓN AMBAR de RIBEIRA
-BARBANZA AROUSA: “ENCONTROS NO CAMIÑO” de Bandamueca Teatro de A POBRA DO CARAMIÑAL e RIBEIRA
-CATEGORÍA LIBRE: “A ENTREVISTA” de Fernando Tato e Susana Sampedro (FERROL E RIBEIRA) – Kraken Films
As orixes
O certame audiovisual de curtas Alberto Romero naceu como unha iniciativa da ANPA Caramecheiro do IES Nº1 de Ribeira no ano 2016, como homenaxe o traballo e dedicación social de Alberto Romero (1961-2015). A esta iniciativa sumáronse inmediatamente as asociacións de nais e pais de San Roque do IES Leliadoura e ANPA do CEIPP de Palmeira, así como a A.C. Lajareu por Barlovento, asociacións das que Alberto formou parte, entre outras.
Co apoio do Concello de Ribeira levouse a cabo a primeira edición en 2017 deste certame na que participaron 19 traballos procedentes dos centros educativos do Concello de Ribeira.
