As mulleres arpistas serán protagonistas na recta final do Noia Harp Fest. Oito mulleres destacan na programación para este sábado 5 e domingo 6 de agosto, xornadas nas que o Festival Internacional de Arpa Vila de Noia pechará a celebración da súa décima edición. Elisabeth Cerra, Claudia Besné, Beatriz Cortesão, Musgö, Begoña Riobó, Laoise Kelly, Mary Macmaster e Beatriz Martínez actuarán nos recitais aos que o público poderá asistir tanto o sábado coma o domingo no Teatro Coliseo Noela e na Praza do Tapal. Ambos espazos acollerán, ademais, a estrea mundial de tres creacións: Hibrys, de Alejandro Civilotti, gañadora da primeira edición do Premio Portus Apostoli; e as suites Micelio e Escumas Atlánticas, escritas por Anxo Pintos e Rodrigo Romaní, respectivamente.
O sábado 5, o Noia Harp Fest e a Asociación Española de Arpistas (AEDA) renderán unha homenaxe especial a Nicanor Zabaleta, considerado o mellor intérprete do instrumento, no seu 30º cabodano. A cita, que terá lugar a partir das 19:00 horas no Teatro Coliseo Noela, estará guiada pola galega Alba Barreiro, que abordará vida e obra de Zabaleta. No concerto participarán dúas arpistas integrantes da Joven Orquesta Nacional de España: Elisabeth Cerra e a vasca Claudia Besné, membro tamén da Neue Philharmonie Munchen.
De seguido, contra ás 21:30 horas, e xa na Praza do Tapal, terá lugar a primeira das tres estreas mundiais que haberá esta fin de semana no Noia Harp Fest: Hibrys, do compositor hispano-arxentino Alejandro Civilotti, e que foi a obra gañadora da primeira edición do Premio Portus Apostoli -certame convocado polo NHF e o Concello de Noia-. A peza será interpretada pola Real Filharmonía de Galicia, dirixida polo galego Maximino Zumalave, e coa arpista portuguesa Beatriz Cortesão como solista. O repertorio da cita tamén contará con obras de Bach e Beethoven.
A última xornada da décima edición do Noia Harp Fest comezará ás 19:00 horas do domingo 6 de agosto cun concerto da arpista, cantante e artista multidisciplinar andaluza Musgö, especialista en arpa eléctrica e looping ao vivo. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela. A creadora presentará algúns avances do seu novo disco, Un sendero, que verá a luz proximamente. Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal, a partir das 21:30 horas, dúas novas composicións creadas especificamente para este concerto: serán as suites Micelio, de Anxo Pintos, que contará coa participación de Begoña Riobó, e Escumas Atlánticas, de Rodrigo Romaní, na que participarán Laoise Kelly, Mary Macmaster e Beatriz Martínez.
O Noia Harp Fest, organizado pola asociación homónima e Nalgures Producións, conta co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboran nesta edición o Liceo de Noia e a Asociación de Española de Arpistas. Para máis información, pódese visitar www.noiaharpfest.gal.
AXENDA NOIA HARP FEST
Sábado 5 de agosto
Teatro Coliseo Noela, 19:00 horas | Homenaxe Nicanor Zabaleta con Elisabeth Cerra e Claudia Besné.
Praza do Tapal, 21:30 horas | Real Filharmonía de Galicia con Beatriz Cortesão. Estrea de Hibrys (Premio Portus Apostoli)
Domingo 6 de agostoTeatro Coliseo Noela, 19:00 horas | Musgö.
Praza do Tapal, 21:30 horas | SonDeSeu + convidadas. Estrea das suites Micelio e Escumas Atlánticas.
