O menor ferido no accidente de bicicleta rexistrado o mércores no núcleo rianxeiro de O Pazo, e do que informamos en “obarbanza.gal” permanece na unidade de críticos do hospital Clínico de Santiago de Compostela nun estado estable dentro da gravidade.
O mozo foi trasladado ao centro hospitalario compostelán presentando fracturas no rostro e múltiples lesións no cranio por mor dunha violenta colisión cun coche que se atopaba estacionado na beiravía.
O rapaz, que circulaba en bicicleta, bateu contra un coche que estaba estacionado na Rúa Pazo, á altura do número 54, en Asados, Rianxo.
Foron varios os particulares que, ao fío das 16:00 horas, contactaron co 112 Galicia para solicitar asistencia sanitaria urxente para un rapaz que ía en bici e que chocara contra un coche.
Decontado, desde o 112 Galicia informouse dos feitos ao Servizo de Urxencias Sanitarias de Galicia-061, que derivaron unha ambulancia ao punto. Tamén foron avisados os axentes de Tráfico, da Policía Local e de Protección Civil de Rianxo, que, debido á gravidade das feridas ocasionadas, encargáronse de recoller aos profesionais sanitarios do Punto de Atención Continuada da localidade para atender ao menor mentres non chegaba a ambulancia. Do mesmo xeito, os xestores do 112 tamén puxeron os feitos en coñecemento dos Bombeiros de Boiro.
Segundo a información recibida no 112 Galicia, os servizos sanitarios tamén derivaron un helicóptero medicalizado, aínda que, finalmente, o rapaz foi evacuado en ambulancia.
