Membros do equipo de Goberno do Concello de Ribeira volveron participar nas mobilizacións da veciñanza de Corrubedo para acadar un médico a tempo completo, mobilizacións que se veñen celebrando cada xoves ao longo da presente tempada. Veciñanza e Concello demandaron unha reunión urxente con Sanidade para “acadar unha solución”.
“Corrubedo necesita un médico a tempo completo tódolos días do ano. A solución que
intentan trasladarnos dende a Consellería de Sanidade, de simplemente ter médico a tempo completo os dous meses de verán non é válida” afirmou o alcalde de Ribeira, Luís Pérez Barral.
No transcurso da concentración, o concelleiro de Sanidade Juan Luis Furones, reclamou unha reunión urxente entre a nova Corporación municipal e a Consellería de Sanidade para incrementar os medios materiais e persoal e garantir unha atención médica de calidade a toda a poboación de Ribeira. “Esta política de contratación mínima non se pode aceptar, seguimos intentando chegar a un diálogo coa Consellería de Sanidade pero non obtemos resposta” indicou.
