A Concellaría de Cultura do Concello de Boiro programou actividades durante o mes de setembro para conmemorar o Mes da Danza en homenaxe ao centenario do nacemento de José Manuel Rey de Viana. A concelleira de Cultura, María Outeiral, presentou na mañá deste 30 de agosto o programa de actividades xunto con membros das distintas compañías que participan nesta conmemoración.
O primeiro dos espectáculos será este venres 1 de setembro ás 22.30 horas no pazo de Goiáns e será Demente da compañía de danza de Fran Sieira. Neste caso os beneficios recadados serán para a asociación AGADEA Alzhéimer.
O seguinte dos espectáculos está programado para o sábado 16 de setembro ás 20.00 horas tamén no pazo de Goiáns e correrá a cargo da escola de ballet Cen Pliés, que representará Alicia no país das marabillas. Os beneficios dos donativos recadados estes días serán para a Asociación de Ayuda a Nenos Oncolóxicos de Galicia (ASANOG).
O último dos espectáculos celébrase o domingo 1 de outubro ás 20.00 horas, coincidindo dos 40 anos de que Rey de Viana trouxera o baile a Boiro. Será o Ballet Folclórico Galego quen represente un espectáculo para festexar a Rey de Viana e no que se recadarán beneficios para a Asociación Española Contra o Cancro.
Todos os espectáculos terán lugar na fortaleza de Goiáns, sen reserva previa, e a entrada será un donativo de 2 euros en beneficio das distintas entidades sociais.
