Hai uns días, espertamos nalgúns municipios de ambas as marxes da ría de Arousa co anuncio dunha posible folga dos traballadores da empresa concesionaria do servizo de limpeza viaria e recollida de residuos.
A folga é un Dereito Fundamental dos traballadores para a defensa dos seus intereses, regulado no artigo 28.3 da Constitución española. Pero, tamén é certo de que, en relación aos contratos públicos, a folga non exime do cumprimento do contrato entre as corporacións locais e as empresas concesionarias, que se atopan sometidas ás condicións particulares asinadas no prego de condicións, no momento da licitación.
Cando se trata de servizos básicos e esenciais, os conflitos laborais entre o persoal e a concesionaria que implica a falta de prestación efectiva do contrato podería motivar a intervención municipal, se se produce unha “grave perturbación do servizo público”. Todo iso a condición de que non exista unha culpa por parte da administración local e sexa meramente un conflito entre a propia empresa e os seus traballadores.
Tamén hai que ter en consideración, que non é menos importante, de que o incumprimento das condicións pactadas no prego de condicións particulares pode conlevar a falta de pagamento ao contratista ou mesmo a resolución do contrato, por parte do propio Concello.
