Reivindicar unhas condicións laborais dignas que se recollan nun convenio autonómico, regulando unhas mesmas condicións para todos os traballadores dos diferentes parques comarcais de bombeiros de Galicia. Non é nada extraordinario o que están a demandar os máis de medio milleiro de bombeiros dos servizos comarcais, dependentes das Deputacións Provinciais e da Xunta de Galicia.
Hai anos que a falta de persoal obriga a que algúns parques comarcais atópense inoperativos porque non teñen profesionais suficientes para funcionar cunha mínima garantía de poder ofertar un servizo de calidade e con seguridade á poboación. Mentres tanto as administracións públicas, Deputacións e Xunta de Galicia, continúan mirando para outro lado, deixando minguado un servizo básico e fundamental para a cidadanía.
Un accidente de tráfico, un incendio nunha vivenda, un sinistro determinado (que poidan requirir os seus servizos), unha queima incontrolada nun monte ou un incendio forestal son algunhas das actuacións destes profesionais, que continúan prestando os seus servizos nunhas condicións laborais máis propias do século pasado, con xornadas laborais insoportables e con salarios, na maioría dos casos, que apenas superan o salario mínimo interprofesional.
