Este sábado 12 de agosto celébrase en Ribeira a II Feira do Vinilo do Barbanza, a Feira Xiradiscos. Será novamente na praza de Vigo durante toda a xornada do sábado.
Ás 12.30 está prevista a inauguración oficial, a cargo do alcalde de Ribeira, Luís Pérez Barral.
A feira vén da man do Smart Studio de Nell Martínez e o selo discográfico local Radix Records, co apoio do Concello e dunha manchea de firmas locais patrocinadoras.
Este ano contarase coa presenza no evento do dúo local @s Jaloch@s, formado por Suso Bello e Sabela Olivares, que actuarán o día 12 pola mañá, no marco das actividades para a rapazada. Suso e Sabela contribuirán co espectáculo musical Ritmando, indicado para rapazas e rapaces de Infantil e de Primaria.
Entre as propostas que vai albergar o certame destaca un mercadiño de discos de vinilo, tamén a presenza do chef Nacho Rodríguez do restaurante A Barbecho de Palmeira na sesión vermú coa degustación feita ad hoc para a feira: Edición Limitada e coa música vinílica un ano máis de Toño Ferreirós (Boiro).
Pola tarde continurá co mercadiño…, xa cara á noite comezarán as actuacións ao vivo con Mentah (Indie-Rock de Ferrol), Feed the Pet (Indie-Rock Ferrol) e Playa Desmayo (Garaje-Punk Coruña) todos os grupos pertencen ao selo ribeirense Radix Records.
Para rematar a xornada contarase co mesturador de audio Nell Martínez picando música do século pasado.
