O pasado sábado 26 de agosto, a localidade de Rianxo despediu a tempada estival coa animada festa Ata Logo Verán, organizada pola Asociación Rianxeira de Empresarios (ARE). Presidiu o evento un ambiente festivo e familiar, congregando a veciños e visitantes nunha celebración que, segundo fixo saber a ARE, “combinou diversión, entretemento e boas vibracións”.
A festa, engadiu a patronal, destacou pola súa variada oferta de actividades que axudaron a poñer punto e final á tempada estival da mellor maneira posíbel. Entre as actividades destacadas espertaron especial interese entre os asistentes o inchábeis e os obradoiros, proporcionándolles momentos de diversión e aprendizaxe. Aderezouse a celebración con flocos de millo e doces de algodón de azucre.
Un dos momentos máis agardados foi a presenza dos integrantes da familia de Os Bolechas, os coñecidos personaxes creados por Pepe Carreiro, que deron vida á festa cunha ruada chea de cor e diversión. Os nenos e nenas tiveron a oportunidade de interactuar cos integrantes da familia, facerse fotos e crear lembranzas deste día tan especial.
Segundo engadiron fontes da ARE, “a festa superou todas as nosas expectativas en canto a participación e diversión, estamos agradecidos á comunidade por sumarse con entusiasmo a esta celebración. A despedida do verán en Rianxo, reafirmou o espírito comunitario da localidade e a súa dedicación por crear momentos de unión e alegría para grandes e pequenos. Agardamos seguir ofrecendo eventos que enriquezan a vida da comunidade no futuro”.
