Foi o dono da vivenda quen contactou co 112 Galicia para pedir axuda urxente.
O choque produciuse no lugar de Graso, Abanqueiro, pouco despois do mediodía, segundo relatou a mesma testemuña, que indicou que o ferido e único ocupante do turismo estaba, ademais, atrapado. Por iso, os xestores do Centro Integrado de Atención ás Emerxencias 112 Galicia avisaron, decontado, aos profesionais de Urxencias Sanitarias de Galicia-061 e aos Bombeiros de Boiro.
Pola súa parte, o equipo médico optou pola mobilización do helicóptero medicalizado con base en Santiago, mentres que os efectivos de salvamento se centraron na liberación do ocupante do coche. Nestas tarefas tamén contaron co apoio dos compañeiros do parque de Ribeira.
Cando xa lograron sacar a persoa do coche, a dotación de Urxencias Sanitarias de Galicia-061 a bordo da aeronave acababa de tomar terra, polo que xa se dispoñían a ofrecer os primeiros coidados ao ferido.
Do mesmo xeito, desde o 112 Galicia pediuse a colaboración das forzas da orde. En concreto, os axentes da Policía Local chegaron ao lugar dos feitos en primeira instancia para prestar a axuda necesaria, aínda que máis tarde continuarán os membros da Garda Civil coas dilixencias pertinentes.
Igualmente, necestouse informar ás empresa subminsitradoras da enerxía eléctrica debido aos danos rexistrados na instalación urbana.
