Este luns 24 de xullo haberá maxia e cultura en Rianxo. No marco da Feira do Libro de Rianxo (e da Rede Cultural da Deputación da Coruña), o Mago Romarís achegará o espectáculo Sorpresa tras sorpresa (Ilusións ópticas + Maxia). Será o luns en horario de 12.00 a 14.00 horas e, xa pola tarde, de 18.30 a 20.30 horas, na praza de Castelao de Rianxo. Organiza o Concello.
Que son as ilusións ópticas?
Segundo lembra o Mago Romarís, “unha ilusión óptica é calquera ilusión do sentido da vista que nos leva a percibir a realidade de forma errónea, un erro na interpretación que fai o noso cerebro sobre os sinais que o ollo lle envía”. Grazas a este “erro” de apreciación, podemos desfrutar de sensacións únicas e incribles. A maiores, engade o mago, “podemos transformar ese suposto erro nunha experiencia didáctica, nunha experiencia divertida, convertela nunha experiencia única”.
O espectáculo que poderemos ver en Rianxo inclúe unha exposición que recolle unha selección das mellores e máis efectivas Ilusións ópticas, desde as máis clásicas e que levan sorprendendo desde hai séculos, ata as máis novas e impactantes.
O seu formato e os seus contidos, dirixidos a todos os públicos,convidan ao espectador a ser protagonista.
