Era un traballador incansable. Por circunstancias, desde unha idade moi temperá, tivo que asumir as responsabilidades familiares. Así, traballaba no mar, desde a madrugada ata a hora do xantar e polas tardes atendía as leiras dos seus pais, cultivando e coidando o millo, o trigo, as patacas, etc. .
Durante máis de medio século traballou como autónomo na pesca de baixura e o marisqueo. Era un pescador respectado e querido pola xente do sector e moi respectuoso co medio mariño.
Unha parte da súa familia utilizouno, en numerosas ocasións, para dirimir conflitos familiares, evitar rifas ou pelexas entre pais, irmáns e fillos. Era un bo pescador, vendía bos lotes diariamente en lonxa e mesmo traía especies para casa e repartir entre familiares e veciños, de maneira frecuente.
Asumiu, voluntariamente, responsabilidades de goberno na Confraría de Pescadores de Carreira e Aguiño, como membro do cabido, vicepatrón maior e presidente da agrupación de mariscadores. Durante anos viaxou moito a outros portos do outro lado da ría de Arousa e mesmo á capital de España, custeándose os desprazamentos do seu propio peto. Era consciente de que había que defender, neses momentos de dificultades, os intereses das familias mariñeiras do sector da baixura e do marisqueo.
Tamén foi un home moi querido e admirado polos responsables pesqueiros daqueles anos, incipientes da futura administración autonómica da Xunta de Galicia. Pedíanlle consello e valoraban o seu traballo honrado na pesca selectiva, tradicional e sostible.
Ao xubilarse, nunca deixou de saír ao mar, na 7.ª lista, e a loitar pola defensa desa práctica pesqueira que lles permitía faenar, cun tope de capturas e un límite de días, para consumo propio.
Os seus últimos anos de vida foron duros, na súa loita contra o Alzhéimer.
Papá, D.E.P.
José Manuel Pena
