A Concellería de Cultura – Concello de Noia vén de publicar a programación completa da XXIV Feira Medieval, un dos acontecementos festivos e culturais máis relevantes da nosa comarca e que, tal e como avanzamos a semana pasada dende este medio, comeza este venres 14 de xullo e achega tres días (até o domingo) de actividades centradas no pasado medieval da vila noiesa.
Segundo confirmou o Concello, este ano porase o foco en ofrecer a veciños e visitantes, durante toda a fin de semana, “unha experiencia inmersiva e envolvente para todos os visitantes”.
Haberá, prosegue a área de Cultura que dirixe José Pérez, artesáns habilidosos e artistas da rúa sobrados de talento, postos de artesanía, cultura medieval a pé de rúa e un amplo programa de actividades, como torneos, xogos para a rapazada e exhibicións, que, xunto co importante aporte de participantes que se agarda, de toda Galicia e do resto de España, contribuirán ao que vén sendo o obxectivo primordial da feira: crear en Noia unha atmosfera auténtica e máxica da Idade Media.
