A comisión de seguimento da Asociación de Empresarios de Ribeira para o desenvolvemento do novo polígono industrial mantivo este xoves 20 de xullo unha reunión de traballo co novo alcalde, Luís Pérez Barral, e con técnicos do Concello, co obxectivo de “abordar o desenvolvemento das obras do novo complexo industrial ribeirense.
Durante o transcurso da xuntanza os integrantes da patronal expuxeron os asuntos que preocupan á asociación sobre como levar a bo porto esta obra. En concreto, tocáronse cuestións como como o
desenvolvemento parcelario, o desenvolvemento urbanístico, o desdobramento da estrada de acceso
e a modificación das rotondas de saída e entrada na autovía, entre outros temas.
A asociación informou dos traballos realizados pola mesma ante diversos organismos da administración ata o día de hoxe. Por parte da alcaldía transmitiuse aos representantes empresariais os seus desexos de colaboración, e comunicóuselles o estado de todos e cada un dos puntos polos que se interesaron, ofrecéndose o equipo de Goberno local para calquera aclaración e brindándose para conseguir un entendemento mutuo que permita conseguir que a obra se leve a cabo o máis rapidamente posíbel.
Na xuntanza ambas as partes comprometéronse para celebrar reunións de seguimento con carácter mensual ou cando calquera novidade así o requira.
A patronal expresou o seu desexo de que todas as entidades implicadas, Xunta, Deputación, Concello e Asociación de Empresarios, “poidamos traballar da man para acadar a consecución da tarefa emprendida”.
Noutra orde de cousas tamén se lle reiterou ao alcalde a postura da asociación acerca do desenvolvemento e finalización da obra da variante, así como diversos asuntos de interese para o comercio, as empresas e a cidadanía, os cales, segundo fixo saber a entidade empresarial, “tiveron unha boa acollida”.
