O Concello de Outes sacará proximamente á licitación a mellora da cuberta da piscina municipal, para corrixir así os problemas estruturais que se levan arrastrando dende a construción destas instalacións. O goberno municipal leva meses traballando na busca dunha solución ás filtracións de auga no edificio e buscando alternativas para financiar as actuacións precisas. Finalmente o concello conseguíu unha subvención do Fondo de Cooperación Local da Xunta de Galicia, que cubre o 94% do investimento previsto, que é de 148.478,73 €.
Segundo indicou o alcalde en funcións, Manolo González, agárdase que a actuación estea rematada a finais deste ano 2023 e lamentou que a Xunta de Galicia dea prazos demasiado axustados para a realización das obras. “Como é habitual apenas temos 5 meses para licitar o proxecto, executar as obras e xustificar o gasto. De atendermos a lei de contratación pública son prazos extremadamente xustos”. Con todo, o actual rexedor en funcións congratulouse da axuda acadada para esta actuación que tamén implicará a retirada das placas solares existentes posto que, “dende a súa instalación hai anos case nunca funcionaron, estando agora obsoletas e inservibles”. Do mesmo xeito sinalou que o goberno local seguirá traballando para mellorar a eficiencia enerxética do edificio, tanto con solucións de aillamento como coa instalación de placas solares que funcionen e que reduzan o importante gasto enerxético destas instalacións”.
