O accidente tivo lugar na recta da Agra de Seidón. O ferido, con mobilidade reducida, foi trasladado polos servizos sanitarios ao centro de saúde da localidade.
O accidente tivo lugar ao fío das oito e media desta mañá. Foi un particular quen, a esa hora, contactou co 112 Galicia para informar de que un coche que circulaba pola recta de Portobravo batera contra un poste. O alertador indicaba que o condutor circulaba moi amodo polo que o golpe non fora moi forte. Ao mesmo tempo, o sistema de alertas incorporado no vehículo “ecall” tamén enviou unha sinal de aviso ao 112 Galicia. De feito, o sistema permitiu ao condutor contactar directamente co centro de emerxencias. Indicaba que acababa de ter un accidente, que estaba ferido e que non podía saír do interior do coche porque usaba cadeira de rodas e as portas non abrían.
Así, desde o 112 Galicia informouse ao Servizo de Urxencias Sanitarias de Galicia-061, aos membros do GES de Noia e aos axentes de Tráfico. Do mesmo xeito, pasouse aviso aos Bombeiros de Boiro e aos efectivos de Protección Civil da localidade.
Logo de evacuar ao ferido foi precisa a intervención do persoal da compañía subministradora do alumeado da zona, tras resultar o poste danado, desprazado e suxeito polo vehículo e que, polo tanto, impedía a súa retirada.
