J.C.- Con saída prevista para as 11.30 desde as inmediacións da rada pobrense, unha vintena de embarcacións procedentes de distintos clubs náuticos das Rias Baixas tentarán levar ás súas vitrinas o prezado Faro de Ons. Desde primeira hora da mañá a mariña da Pobra será un fervedoiro de tripulantes pertrechando as súas embarcacións para dispoñerse a realizar un percorrido de 35 millas co obxectivo de circunnavegar as illas de Ons e Onza e regresar ao porto do Caramiñal.
A previsión meteorolóxica anuncia un nordeste típico da ria de Arousa nesta época do ano e agasallará á vintena de embarcacións cuns 10-12 nós, que farán que a ría se converta no marco perfecto para gozar dunha espectacular xornada de regata.
Entre os favoritos á vitoria final atópanse embarcacións e regatistas que xa saben o que é gañar esta prestixiosa regata, como o vigués Víctor Carrión e o seu Bonn III, que o ano pasado dominou a clase regata e vén de facerse co Gran Trofeo Faro de Corrubedo. Outro dos gañadores que repiten na liña de saída son o pobrense José Manuel Pombar patroneando o seu Cámping Ría de Arousa, con varias vitorias nesta regata ás súas costas na clase cruceiro-regata, ou o Orlando, de Gerardo Sánchez que o ano pasado fíxose coa clase cruceiro e leva unha espectacular tempada sendo un claro favorito á vitoria nesta división. Outros candidatos á vitoria final son o Ronautica Marinas, de Joaquín Carneiro “Piri”, un clásico da Ría de Pontevedra e da Volta a Ons, os vilagarciáns Santana´s e Narval, o Nahela representando ao CD Alagua da Guarda, ou o Ziralla de Ramón Barreiro. A frota local estará formada por 7 embarcacións (Thor II, Lorcho, Chispetrén, Argos, Cámping Ria de Arousa, Alpha e Mauritania).
Desde o Náutico Arousa Norte queren agradecer a Clínica Dental Gonzalo López Castro e Atlantic Dental Institute a súa implicación, sen a cual non sería posíbel realizar esta clásica regata.
