O Concello de Boiro recibiu unha subvención por importe de 48.564 euros da Axencia Galega de Desenvolvemento Rural no marco do Plan de mellora de camiños rurais 2023-2024. O importe subvencionado vaise destinar a levar a cabo a mellora do camiño que une Cariño coa Igrexa e o cemiterio do Castro.
As actuacións ascenden a 63.522,77 euros. “Estas obras pretenden a mellora de zonas moi transitadas de núcleos do rural, mellorando os servizos e a vertebración do territorio”, afirmou o alcalde, José Ramón Romero, explicando que no tramo que percorre o núcleo rural de Cariño mantense a sección existente, que varía entre os 4,40 e os 6 metros, onde se vai levar a cabo a renovación do pavimento asfáltico e incorporarase sinalización de limitación de velocidade para aumentar a seguridade viaria. No treito que chega a Igrexa e ao cemiterio pretendese a execución dunha rede de recollida de pluviais e completar a sección asfaltada.
As actuacións lévanse a cabo mediante o Plan de mellora de camiños rurais 2023-2024, co-financiado co Fondo Europeo Agrícola de Desenvolvemento Rural (FEADER) no marco do Plan estratéxico PAC 2023-2027 en Galicia.
