O Concello de Boiro abriu o prazo de inscrición para as actividades deportivas de verán que se desenvolven entre o 26 de xuño e o 1 de setembro de 2023, ao abeiro da nova edición (a número 30) do programa Veráns Deportivos. Toda a información e inscricións está dispoñíbel no Departamento de Deportes, situado na Casa da Cultura de Boiro.
Os Veráns Deportivos de Boiro chegan á súa trixésima edición con propostas de actividades deportivas para rapaces e rapazas como son remo, piragüismo, volei-praia, baloncesto, atletismo, tenis, iniciación ao taekwondo, vela… Tamén inclúen actividades para mozos e adultos como tenis ou vela e ximnasia para xubilados e o programa Boiro Actívate para persoas con doenzas especiais.
Ademais destas actividades haberá competicións propias que organizan os clubs deportivos xunto co servizo municipal de deportes como son o Campus Rufino Regueira de natación e triatlón, o Campus de Baloncesto Obradoiro CAB, torneo internacional de rugby, campus de volei-praia, a Travesía a Nado Illa da Bensa…
O prazo de inscrición nas actividades está aberto dende este xoves 15 de xuño e todas as persoas interesadas poden dirixirse ao departamento de deportes situado na Casa da Cultura de Boiro ou contactar mediante o correo deportes@boiro.org ou o teléfono 981 84 84 25.
