Este xoves 15 de xuño o alumnado da formación en Actividades Auxiliares de Comercio, Almacén e Reparto a domicilio, que se está impartindo en Ambar, visitou a sede da empresa Triñanes e Hijos, Suministros Industriales S.L. de Boiro. A xornada comezou cunha charla impartida por Gonzalo Triñanes, xerente na empresa, adicada á distribución de roupa de traballo e artigos de seguridade laboral que prové a múltiples sectores.
Na súa charla achegou ao alumnado ás singularidades da súa firma e das bases necesarias para o traballo, facendo fincapé na importancia da seguridade na contorna laboral e nas bases que definen a súa actividade día a día: calidade de produtos, formación, modernización, seguimento, contacto e positividade.
Posteriormente as alumnas e alumnos tiveron a oportunidade de visitar o seu centro no Polígono de Espiñeira (Boiro) e coñecer de primeira man o funcionamento e a xestión do seu almacén, complementando todo o aprendido durante a formación teórica do curso.
Este curso está co-financiado polo Fondo Social Europeo (FSE), a través da Convocatoria de Axudas Económicas para a Selección de Operacións para o Reforzo da Empregabilidade das Persoas con Discapacidade POISES “Uno a Uno” – Año 2022 – 2023 impulsada pola Fundación ONCE.
A formación enmárcase na actuación do Obxectivo Temático 9: Prioridade de Inversión 9.1. Obxectivo Específico 9.1.2. relativo a aumentar a contratación de persoas con discapacidade en situación ou risco de exclusión social.
