Este xoves 15 de xuño continúan as accións de eliminación e control de especies exóticas invasoras no entorno fluvial do río Tins no Concello de Outes, como parte do proxecto Renatur_Outes. Nesta nova xornada de traballo, que comezará ás 10:00 da mañá e que está aberta a todos os públicos, participarán as estudantes da especialidade de control e protección do medio natural do Centro Integrado de FP de Santiago de Compostela.
Esta intervención centrarase na eliminación de exemplares de acacia negra (Acacia melanoxylon), mimosa (Acacia dealbata) e falsa acacia (Robinia pseudoacacia), así como nunha primeira intervención demostrativa sobre unha zona con herba da fortuna (Tradescantia fluminensis). Todas estas especies supoñen un obstáculo a recuperación do bosque de ribeira e do entorno fluvial, obxectivos deste proxecto liderado polo Concello de Outes e que conta coa participación de investigadores das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal) así como co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
O proxecto ReNatur_Outes continuará traballando nos dous próximos anos con outras accións de limpeza de residuos da contorna fluvial, sensibilización medioambiental mediante accións de voluntariado, formativas e divulgativas e fomento a participación pública da cidadanía de Outes mediante sesións de gobernanza cidadá ao longo de toda a vida do proxecto. Desde xeito non só se pretende alcanzar unha recuperación e mellora da biodiversidade, mais xerar un compromiso social máis alá da propia vida do proxecto.
