A Pobra viviu unha nova noite de vandalismo onde varios individuos actuaronna alameda da localidade e a súa contorna. Entre os danos que ocasionaron figuran a rotura dun semáforo situado na zona dos xardíns Valle-Inclán, que quedou esnaquizado sobre o chan, e os danos que sufriron varios vehículos estacionados na zona portuaria. Está confirmado que a lúa dianteira dun coche quedou feita cachizas e que algún outro turismo sufriu danos similares.
Entre os actos figuran tamén a rotura dun farol e unha papeleira situadas nos xardíns Valle-Inclán, e danos en sinais da contorna do parque de O Castelo. Ademais, os vándalos esnaquizaron a iluminación da nova escultura de Manuel Teira, inaugurada en febreiro en memoria dos mártires do franquismo.
Membros da agrupación realizaron un percorrido polo centro urbano para elaborar un informe sobre as desfeitas ocasionadas polos vándalos e tratar de recompoñer os elementos do mobiliario urbano que podían arranxarse. Crese que os causantes dos danos actuaron entre as seis e as sete da mañá deste domingo.