O IV Ciclo da Universidade de Santiago na súa sede en Ribeira abre a partir do luns 19 de xuño o prazo de matrícula para o curso 2023-2024.
Todas as persoas maiores de 50 anos que o desexen poden formalizar a súa matrícula ata o 31 de xullo na páxina web da Universidade de Santiago.
As persoas que soliciten por primeira vez a súa matrícula poden dirixirse ao Centro Cultural Lustres Rivas de Ribeira de luns a venres de 8 a 14 h para cubrir os datos da preinscrición que se enviarán á USC, ao agardo da alta como novo/a alumno/a e a correspondente folla de pagamento de taxas.
A formación universitaria a partir dos 50 anos é posíbel en Ribeira grazas ao convenio asinado en 2019 entre a USC e o Concello, que lembra que “a creación dunha sede universitaria do IV Ciclo dirixida a persoas maiores de 50 anos, promove a formación continua, a democratización dos estudos universitarios…, en definitiva a universalización da formación universitaria trasladándoa da capital de Galicia á cabeceira da comarca do Barbanza”.
Entre as materias figuran literatura española contemporánea, o Camiño de Santiago, historia da arte de Compostela, comunicación xornalística, aspectos básicos da calidade de vida e medicamentos. Pódense consultar na web da USC.
