O Concello de Boiro convoca un proceso selectivo para contratar directores e monitores para o campamento de conciliación do verán. As bases dos procesos selectivos e toda a información sobre os procesos están a disposición das persoas interesadas na web municipal.
Para participar neste proceso selectivo é preciso cumprir unha serie de requisitos esixibles para acceder ao emprego público como son ter a nacionalidade española, ter cumpridos os 18 anos, non padecer
enfermidade ou defecto físico que impida o desenvolvemento das funcións, non atoparse incurso en causas de incompatibilidade e non ter sido despedido mediante expediente disciplinario de ningunha
administración pública.
Ademais, hai unha serie de requisitos específicos en cada un dos procesos. Para o de director é necesario estar en posesión do título de bacharel ou técnico e dispoñer de algunha das seguintes titulacións: Título
de Técnico Superior en ensinanza e animación sociodeportiva, Título de Técnico Superior en Animación Sociocultural e Turística ou Título de Técnico Superior en Termalismo e Benestar.
Para o caso de monitores/as de actividades de tempo libre é necesario estar en posesión do título de graduado en educación secundaria obligatoria e a titulación de Técnico en Guía no Medio Natural e de Tempo Libre.
As persoas interesadas en formar parte destes procesos deberán presentar as súas instancias de solicitude a través do Rexistro Xeral ou sede electrónica do Concello de Boiro nun prazo de cinco días hábiles a contar dende o día seguinte ao da publicación da convocatoria no Boletín Oficial da Provincia.
