O exalcalde de Rianxo Adolfo Muíños foi protagonista dunha homenaxe sorpresa que lle organizaron os seus compañeiros do BNG rianxeiro con motivo da súa despedida da primeira liña política.
A cita organizouse ás súas costas e ninguén quixo perder a oportunidade de participar, tampouco Ana Pontón, que aínda que non puido acudir enviou unha mensaxe a un emocionado Muíños, de quen dixo que «dese compromiso co país nin dimitiches nin dimitirás nunca. Obrigada, Adolfo, pola música, polo traballo ben feito en Rianxo e polo amor por Galiza».
Nas intervencións falaron o responsábel comarcal do BNG, Luís Pérez Barral; o académico Xosé Luís Axeitos, o presidente da Fundación Rosalía, Anxo Angueira; Aurora Marco, Mini Rivas ou Rosana Pérez. Incluso o rianxeiro arcebispo emérito de Tánger, Santiago Agrelo, enviou unha mensaxe.
Os discursos deron paso aos agasallos: unha obra de Ché Tembra e as figuras dunha pescantina e un mariñeiro xunto a uns versos de Manuel Antonio para Muíños, e un colgante para Covadonga Rodríguez, a súa esposa. Adolfo Muíños incorporouse este mesmo luns ao seu posto de funcionario en Santiago, deixando atrás 12 anos na alcaldía rianxeira.
Cedida
